Vertaal vanaf Ash Wednesday (Jim Burklo)
Op my voorkop
‘n Teken van die kruis
Gesmeer in as vanuit die vuur
Wat my hubris-paleis afgebrand het
En, saam met dit,
Die geld wat ek weg moes gee,
Die TV wat ek as sintuigverdower gebruik het,
Die tapyt waarop ek veronderstel was
om op te verskyn,
Die deure wat ek vir veronderstel was
om vir ander oop te maak,
Die koeverte wat ek veronderstel was
om vir liefdesbriewe te gebruik
Die wyse boeke wat ek so oop en bloot uitstal,
om die illusie te skep dat ek dit gelees het,
Die lee spasies in my fotoalbums,
waar my donkerder, swaarder, seerder oomblikke onthou moes word,
Die kalenders waar besoeke aan die wat dit die meeste nodig gehad het,
geskeduleer moes word,
Die rusbank van my verlamende oorgerustheid,
Die gemakstoel van my luiheid,
Die hemde wat ek volgestop het met my eie trots,
Die skoene wat ek met ander moes ruil,
sodat ons gereisde myle kon deel.
Op my voorkop
‘n Teken van die kruispad,
Waar ek kan wegdraai van die pad van verderf,
Na die Weg van die Lewe.
(vertaling deur Hanno Langenhoven)
Seeking Mystery 